Próximo inicio das beirarruas en Barallobre

O BNG espera que antes de finalizar o ano comecen as obras de construcción das beirarruas entre a farmacia e a pista de atletismo de Barallobre. Urbanizaránse así as inmediacións dos Institutos de Ensino Secundario, unha zona por onde transitan a diario numerosos vehículos e peóns por unha estreita calzada. Desa obra e doutros proxectos para Barallobre, falaráse na reunión que este venres manterán dirixentes do Bloque de Fene con militantes e simpatizantes desa parróquia. Tal e como se marcaba no Plano Estratéxico aprobado no pasado mes de xaneiro, a formación nacionalista realiza estas reunións parroquiais para dar conta dos proxectos máis inmediatos para a zona, e tamén recabar propostas, suxerencias e críticas.

Os acordeonistas trunfan no Alborada

Moita animación rexistrouse na NOITE DO ACORDEON celebrada no local do BNG de Fene o venres 2 de xuño. O animador e escritor Xurxo Souto conduciu o acto e gabou a vocación musical de Ferrolterra. Serafín Santamariña (con 9 anos), Sabela e Tamara, Xurxo Vazquez e Manuel Cociña interpretaron con mestría e virtuosismo os seus acordeóns, e fixeron cantar aos asistentes que ateigaban o Alborada.